احنا ولا البلد

..ولاد البلد ! نفسنا نحب مصر بجد، لا نقعد نطلع فيها القطط الفاطسة.. ولا نفضل نغنيلها إنها أم الدنيا وأجمل بلد في الدنيا.. لإنها لا هي وحشة قوي.. ولا هي عاصمة النور..

سمعنا بيت الشعر ده مرة واحنا قاعدين سوا، وسألنا نفسنا نفس السؤال.. هو إحنا بنحب مصر..وكانت المفاجأة الفظيعة.. إننا كلنا مش عارفين!!لا إحنا عارفين إن كنا بنحبها ولا لأ..ولا إحنا عارفين حتى يوم ما نحبها نحبها إزاي..الناس حوالينا مقسومة نصين..الأولاني: شايف مصر أم الدنيا.. حتى ولو كان ملهاش أب..والتاني: مش شايف في مصر غير الزبالة والحثالة والقناة الخامسة..إنما إحنا..إحنا عارفين كويس إن مصر أم الدنيا، وفي نفس الوقت ينتفرج على القناة الأولى والتانية، أينعم هما مش حلوين.. بس هنعمل إيه لما الدش يعطل!!؟باختصار، احنا واخدين قرار إننا نحب البلد دي.. بالذوق بالعافية هنحبها.. لإننا باختصار.. معندناش غيرها (!!)تعالوا الأول نقولكم إحنا مين..
لحظة ميلادنا :
كانت خلال الـ30 سنة اللي فاتت .. عشرينات بقى!!
اسماءنا :
محمد ومحسن ومايكل ومنيرة..مسلم على مسيحي.. وحدة وطنية يعني..
عنوانا :
الدقي والجيزة وطنطا وإسكندرية والمعادي وأسيوط وبولاق الدكرور.. يعني كل شارع وكل حارة في البلد..
أحوالنا :
عايشين، صابرين ع الهم، وفرحانين إننا قادرين نصبر، باختصار.. احنا بنتلكك علشان نفرح.. بننتهز الفرصة عشان نثبت فيها اننا قادرين نعمل أي حاجة.. وبنعملها!
أحلامنا :
نفسنا نعيش.. من غير هامش ..إحنا يا ناس جيل الهامش ..هامش حرية وهامش ديموقراطية وهامش هوا نضيف وهامش عيشة كريمة ..
إرادتنا :
حديد ..لإننا معندناش اللي نخسره ..لكن كلنا أمل إننا هنكسب كتير بحريتنا ..استنونا ..يمكن ندق علي بابكم بكرة ..النهاردة ..دلوقتي ..معندناش وقت نضيعه ..قوموا معانا!............ ...نفسنا نحب مصر بجد، لا نقعد نطلع فيها القطط الفاطسة.. ولا نفضل نغنيلها إنها أم الدنيا وأجمل بلد في الدنيا.. لإنها لا هي وحشة قوي.. ولا هي عاصمة النور.. تعبانين، لكن قادرين ننبسط وإحنا ماشين في وسط البلد، جعانين.. لكن ترمس الكورنيش بيصبرنا ع الجوع، وطبق أبو طارق رخيص وبسيط.. وبيشبع!بنروح Chilis وCortigiano و Nile Maxim وBlue Nile...مرة كل كاااام شهر...و Crepe away و Fish market معزومين طبعا !!!بنحب مصر، مصر الحقيقية اللي شايفينها بعيونا، لا بعيون الأجانب.. ولا بعيون الأهرام والأخبار والجمهورية.. كل أملنا إننا نعيش ونموت في البلد اللي اتولدنا فيها.. وإننا نوفي حقها علينا... لإننا ولادها.. ولاد البلد.. تعالوا معانا!