الغلابه

الــغلابـــــــــة


في يوم جديد ومش سعيد
في بيت قديم من غير حديد
عــم عــيد قــام من نـومه
صلي الفجر ولبس هدومه
صحي اولاده وصبح عليهم
شاف احلامه في نظرة عنيهم
*******
ابـنه الصغير خمـس سنين
قاله يا بابا رايح على فيـن؟
قال ياحبيبي رايح على شغلي
هرجع بسرعة وهخلص بدري
سلم عليهم وخدهم في حضنه
واتكل على ربه وسلمله امره
بدأ طريقه والمشوار بعيد
واتمشى لغاية السكة الحديد
شاف الناس اشكال وألـوان
ناس تـركب اكـسبريس
ونــاس تركب الغلبــان
وعم عيد مش لاقي مكان
*******
ركب مع الغلابة اللي هو منهم
العيشة النضيفة بعيدة عنهم
وقف في ركن عليه بالمقاس
في وسط الخنقه وزحمه الناس
ومفيش للرجل مكان ينداس
شويـة يقـف وشـوية يقـوم
ومن كتر تعبه راح في النوم
قام على صريخ واحد جنبه
وطل من الشباك اللي عنده
شــاف قطـر جـاي عليـهم
بيقرب منهم وهيخبط فيهم
*******
عم عـيـد وقـف مـكـانه
وسط صراخ الناس من الخوف
مش بيفكر غير في عياله
والكل على حياته ملهوف
بس القدر قــال كلمته
وصوت الموت الناس سمعته
الـمنـاظر كـانت رهــيبة
والـحديد اصبـح عجـينة
ومـات عــم عيـد الغلبـان
وغطي دمه على القضبان
*******
ونرجع ونقول مبن المسؤول
ومـن العـقاب مين هينـول
ويطلع ويقولك ده خطأ مشهور
يا من السواق يا من السيمافور
عيني على الغلابة اللي في بلدنا
وعيني على اللي راحوا من ولدنا